Електричната енергија, неопходен дел од нашето секојдневие

Четврток, 02 Октомври 2008 04:57

Просторот околу нас изобилува со енергија, позната или непозната, забележлива или не, употреблива или не. Сево ова зависи од видот на енергијата. Живите суштества се способни преку хемиски процеси во своите тела да ја обезбедуваат потребната енергија. Растенијата се првите во тој синџир на нејзино пренесување и трансформација, користејќи ја сончевата енергија за фотосинтеза. За разлика од другите живи суштества, човекот се служи со многу средства за кои е потребна дополнителна енергија. Многу апарати, почнувајќи од домаќинствата, па до индустриските објекти, се приспособени да работат на електрична енергија, успешно трансформирајќи ја во механичка, топлинска, во светлинска (зрачење), во зависност од потребата. Тоа е така затоа што релативно едноставно и евтино се транспортира и се трансформира.

ОД КАДЕ ДОАЃА ЕЛЕКТРИЧНАТА ЕНЕРГИЈА

Потрошувачката на електрична енергија во светот сé уште е во пораст, а со тоа и производството. На светско ниво, до 2020 година потрошувачката на електрична енергија, во однос на од 2004 година, е предвидено да се зголеми речиси за 50%, (според податоците објавени во годишниот извештај на Електрани на Македонија (ЕЛЕМ) за 2004/2005 година).

Како причини за ова може да се наведат растењето на бројот на жителите на планетава, порастот на индустриското и друго производство во многуте земји во развој, поттикнувањето на потрошувачките навики, односно порастот на потребата за удобност.