ДЕНЕШНИТЕ ЖЕНИ НЕМААТ РАСИПАНИ ГЕНИ

Напишано од Др. Јадранка Бибан - Спец. гинеколог акушер Среда, 09 Декември 2009 20:37

Голем процент од жените денес страдаат од гинеколошки заболувања кои го уништуваат квалитетот на нивниот живот. Две третини од жените денес страдаат од таканаречениот менопаузален синдром и најпродуктивниот период од животот го поминуваат барајќи излез од неподносливата состојба во која се наоѓаат. Од друга страна голем број на жени кои сеуште не се во периодот на менопауза секој месец страдаат од таканаречениот предменструален синдром кој со денови го нарушува нивното психичко и физичко здравје преку зголемен крвен притисок, напнатост, надуваност, болки во стомакот и дојките, ужасни главоболки, несоница, раздразливост...

Илјадници девојчиња страдаат од болни менструации и со денови изостануваат од секојдневните обврски на училиште или на факултет, заради онеспособеност, малаксалост и понекогаш екстремно искрварување.

Илјадници жени се судруваат со проблемот на екстремни крварења, тумури на матката или цисти на јајниците. Многу од нив се советувани да направат операција и да извадат дел од своите генитални органи како решение за нивниот проблем.

Колку млади жени денес страдаат од полицистични јајници, кои се обвинуваат за неплодност и други хормонски пореметувања. Колку жени страдаат од ендометриоза.

Што се случува со жената во современото општество? Дали жената го губи квалитетот на своите гени и станува организам кој е помалку вреден и осуден на рана пропаст и страдање? Дали природата го менува својот став спрема женското тело и одлучува да го уништи казнувајќи го на страдања и болки? Колку гинеколози искрено и отворено размислуваат за тоа зошто толку многу патологија кај жените се јавува денес? Колку се помислува на вистинските причини за сите овие болести...Дали во женското тело има орган повеќе? Дали тумурите на матка се јавуваат затоа што во телото на жената има матка...? Дали предменструалниот синдром се јавува затоа што женското тело лачи женски хормони? Ако е така тогаш какви хормони треба да лачи женското тело? Машки? Дали цисти на јајници се јавуваат затоа што во женското тело без потреба има јајници?

Ако се размислува со мозокот на ножот, излегува дека органите во женското тело се виновни за болестите кои ги манифестираат, па затоа најдобро е да се отстранат, и жената така помалку ќе биде жена и помалку ќе биде болна...

Но свесните луѓе, особено вистинските стручњаци не размислуваат така. Се разбира дека гените на денешната жена не се помалку вредни од гените на жените во минатото. Тие се исти. Се промениле само животните навики кај жените. А тоа не се лекува со операција или со таблети. Не се виновни женските органи или женските хормони за болестите кај жената.

За најголемиот број гинеколошки проблеми одговорноста треба да се бара во нездравата исхрана и лошите навики. Со сосема едноставна промена на исхраната, со елиминирање на лошите навики, најголемиот број гинеколошки проблеми кај жената буквално исчезнуваат. Вистинските стручњаци тој факт никогаш не треба да го занемарат!