ПРОМЕНА НА СТАВОТ ВО ОДНОС НА МАМОГРАФИЈАТА КАКО МЕТОДА ЗА ПРЕВЕНЦИЈА НА РАКОТ НА ДОЈКА

Напишано од Д-р Јадранка Бибан Недела, 04 Април 2010 17:44

После години и години гласно викање и туркање на жените во редица за мамографија, изминатиов месец срамежливо „виткање на опашката“ од страна на американските лекари за тоа дека погрешиле во однос на тоа прашање. Но, тие барем малку ја подзавиткале опашката, додека кај нас...

Не знам зошто таа информација измина многу бледо, срамежливо, многу кратко објавена на нашите медиуми? Само неколку реченици во однос на мамографијата како непотребна и штетна за таканареченото „рано откривање на ракот на дојка“ кај жените под 50 годишна возраст. Дали после оваа информација настана момент на размислување и кај нашите „стручњаци“ кои нон-стоп по медиумите апелираа сите жени од 40 години нагоре да се јавуваат на мамографија еднаш годишно? И не само таканаречените стручњаци, туку и бројни естрадни уметници, пејачи, познати жени од јавниот живот, Јованки Орлеанки, за жал, и после оваа информација продолжија да ги повикуваат жените да одат на мамографија, најверојатно обземени од улогата на платени викачи кои воопшто не слушаат ниту регистрираат нешто друго што се разликува од она за што тие се „програмирани“ да го прават...

8-КА уште од своето формирање, постојано напоменува дека мамографијата не е превентивна метода и таа не може да го открие рано карциномот на дојка. Тоа важи и за жените под педесет години и за жените постари од педесет години. Искуствата во светот покажаа дека мамографијата како масовно применувана рендген дијагностика, може многу повеќе да нанесе штета отколку корист. Масовното подвргнување на жените на мамографија секоја година е сврзано со голем број несакани ефекти од самата мамографија, како што се голем број непотребни пункции, биопсии, па дури и операции, а да не зборуваме за последиците од претрпениот стрес кај жената додека трае процедурата на целосна дијагноза на „сомнителниот јазол“. Освен тоа, мамографијата е штетна и сама по себе затоа што механички го оштетува ткивото и спаѓа во типот на радиодијагностика, што значи дека и самата е потенцијална опасност за предизвикување на рак.

Но, како сега едноставно да се каже „извинете“? Дали е тоа доволно? Но, во светот на официјалните закони сè е возможно...Но, каде се докторите? Зошто има многу мал дел од нив кои се спремни самите да донесат некаква одлука која ќе биде од корист за нивните пациенти, а сепак ќе се разликува од „официјално озаконетата одлука на научната јавност?“ Зошто докторите се откажуваат од правото на свое сопствено размислување?

Многу повеќе ќе им се помогне на жените ако им се каже дека ракот на дојка е предизвикан од нездравата исхрана богата со масти, како што е месото, млекото, разните масла кои се применуваат во исхраната, но и од загадувачите на околината, пестицидите кои се користат во земјоделието... Многу попаметно би се искористиле парите кои се фрлаат за масовни мамографии ако се дадат за едукација на населението што значи да се живее со вистински здрави животни навики, што значи да се јаде вистински здрава храна.