ПАНДЕМИЈАТА НА СВИНСКИ ГРИП

Напишано од Д-р Јадранка Бибан Недела, 04 Април 2010 17:50

Ова е вториот момент кој го обележа здравството во изминатиов месец и кој е сè уште актуелен. Како изминува времето, информациите за зголемен број на болни од овој грип се сè почести, но и информациите за бројот на починати. Она што може да се забележи, е фактот што многу малку се информира за претходната здравствена состојба на починатите. Дали тие биле болни претходно и од што биле болни. Тоа важи повеќе за луѓето кои починале од компликации на грипот, а се на помлада возраст. Така, без „појаснување“ излегува дека грипот „коси“ млади и здрави животи. Ако е така навистина, тогаш во извештаите треба да се напомене дека младите луѓе претходно биле исклучително здрави, не примале никаква терапија, живееле сосема здрав животен стил...

Во однос на свинскиов грип, има уште многу други контроверзии. На пример, за безбедноста на вакцината. Официјалните стручни лица упорно секој ден тврдат дека вакцината е крајно безбедна, така што и тие јавно, пред камерите на медиумите, се вакцинираат. Но, само два – три дена подоцна стасува соопштение од Светската здравствена организација со кое се препорачува претпазливост со вакцините за свинскиот грип, бидејќи предизвикуваат парализа...? Истовремено, неколку канадски области ги вратиле вакцините, неколку министри за здравство од европските држави излегуваат со јавни изјави за сомнение за целата оваа работа со грипот...

Уште една од многуте контроверзии во врска со грипов е лекувањето на грипот со Тамифлу. Од каде излезе сега толку добар лек за грип кога самата наука тврди дека вирусните болести не се лекуваат со лекови??? Ах, да, да... Тамифлу сега не делува во Велика Британија (сигурно во најскоро време и кај нас), затоа што вирусот сега измутирал! А само што донесоа одлука да не се испитува лабораториски секој случај, туку само според симптомите да се прогласува за болен од свински грип. Можете и по телефон да се јавите, да ги опишете симптомите и ќе ве запишат во бројката болни од свински грип. Ами замислете ако сте болни од вирусот кој е измутиран...? Игри без граници со вирусиве...