ДИСЦИПЛИНА И ПРИ ЈАДЕЊЕТО
Четврток, 05 Март 2009 02:30
Зенот е јапонска духовна традиција која плени со уникатните обичаи во уредувањето на градините, подготовката на чај, земањето на оброците. Правилата при земањето на оброците во нивните манастири биле толку рафинирани што биле внимателно објаснети во специјални прирачници. Едно од правилата било да се рецитираат одредени сутри во текот на оброците, за повторно да се освежи сфаќањето на монасите за значењето на јадењето и да се продлабочи нивното внимание, а со крајна цел да се постигне соединување во совршено единство со самото земање на оброкот. Било важно: кога мислат на храната да мислат од каде дошла таа; да ја прифатат како понуда; за да се заштитат од замките на својот ум и за да се одвојат од своите грешки, пред сè требало да ја совладаат лакомоста; ако чувствуваат телесна слабост, го земаат оброкот како лек.
Гледајќи во оваа традиција, веројатно повеќето ќе сфатат дека најчесто јадат механички, само за да се заситат, и со брзање. Не може секогаш да се вадиме на недостигот на време, и ако не секогаш, зошто повремено да не помислиме и ние за тоа колку луѓе биле ангажирани за да може да го имаме тоа јадење? На пример, оризот, зеленчукот, житото, и она што во мигот го имаме на трпезата некаде биле одгледани, некаде растеле, биле собирани и обработени. Колкав човечки напор бил вложен во сето тоа? Освен тоа, какви сè природни сили учествувале во тој процес: сончевата топлина, хранливите материи од земјата, влијанието на ветерот и водата, промената на сезоните. Методите на одгледување на културите и на производството на храната, што не се само плод на современите луѓе, туку и на напорите на луѓето од минатите времиња. Како таа храна била транспортирана за да можеме да ја купиме во продавница? Кога ќе помислиме на сето тоа, ќе видиме дека бројот на оние што учествувале и се грижеле за неа е речиси бескраен. На ова зен - монасите се потсетувале на секој оброк.
Се разбира дека тоа е дел од нивната практика за стекнување на контрола над умот и за исцелување од трите основни зли болести: пред сè лакомоста, а потоа лутината и незнаењето. Овој подвиг е голем и вреден за почитување, од кој барем малку може да научи и да го примени секој, да има почит кон храната, да помисли на другите човечки суштества што можеби гладуваат, и да посака сите да го добијат она што им е потребно.
Центар за јога и личен развој
Курсеви за почетници, средни, напредни, за деца и возрасни
тел. 32 33 533
| < Пред | Следно > |
|---|
