Коментар на 8ка: Кога науката е во служба на профитот

Сабота, 27 Септември 2008 07:13

Коментар кон написот Кога науката е во служба на профитот

Науката е создадена од човекот, но како природен процес и треба да е секогаш во служба на човекот. Науката е заслужна за многу револуционерни дела на човештвото, за создавањето изуми што го спасиле светот од уништување, за создавањето начини и средства со кои животот на луѓето стана многу поквалитетен.

Всушност, човекот како вид не може да опстои без наука, затоа што таа и природно е наменета за човекот, односно само човекот е единствено живо суштество на планетата што е способно да ја користи науката. Само човекот е надарен со ум и со разум. Начинот на кој живеат нашите генерации во дваесет и првиот век е дело на човекот и на неговата наука. За сите остварени цели и за напредокот на нашата цивилизација во кој ние сега уживаме, е заслужна науката.

Но дали е заслужна науката и за човечките несреќи и страдања? Дали е виновен Ајнштајн за своите научни откритија?

Ако ја обвиниме за тоа науката, значи дека сè уште не сме дораснати за тоа да ја „поседуваме“и да ја користиме како неразделен дел од нашиот живот. Науката не е виновна за злоупотребата на нејзините откритија. За тоа не се виновни ниту научниците.

Научниците не ја ставаат својата наука во служба на профитот. За тоа е виновен потхранетиот и разбезнет човечки стремеж за пари, за власт над некого, за сила. Тоа е желбата да се поседува сè, да се поседува сопствената мајка, да се поседува природата.

Природата не може да се поседува, туку може да се живее само заедно со неа. Само во хамонијата на заедничкиот живот природата ќе направи отстапки и промени на сопствените закони за да го спаси своето чедо – човекот од уништување и од исчезнување од планетата.

Тоа не значи дека треба да ги запреме истражувањата и развојот на науката, затоа што ако го направиме тоа, тогаш престануваме да бидеме луѓе. Напротив, човекот мора да истражува и да бара начини за подобрување на квалитетот на својот живот, и тоа треба да се прави постојано. Но дел од вистинската и висока наука треба да биде борбата за создавање општествени заедници и општествени уредувања, каде што односите меѓу луѓето ќе бидат изградени врз основа на високи морални норми, вистински хуманизам, слобода на размислување, вреднување на трудот и подеднаква можност секој да учествува во донесувањето важни одлуки за сопствената иднина и начинот на кој ќе го живее сопствениот живот.