Дали здравата храна е изум на современоста?

Напишано од Ружица Панева - дипл. социолог Вторник, 21 Јули 2009 13:56

Денес храната станува една од водечките светски теми. Постои една противречност на светско ниво поврзана со неа. Од 6 милијарди луѓе на Земјата, една милијарда се гладни, додека исто толкав број патат од дебелина, како резултат на изобилството на храна. Згора на сè, сè поинтензивно се промовира концептот на здрава храна, кој се смета за современ концепт, многу модерен, придобивка на денешното доба. Но, дали е навистина така ?????

• Што претставува концептот на здрава храна?

Концептот на здрава храна најчесто е сфатен како прехранбена култура, стил на исхрана и сл., кој му овозможува на организмот оптимално да работи и да ја одржува  неговата физичка и ментална рамнотежа. Тој заговара менување на постоечките навики во исхраната, избегнување на продукти кои му наштетуваат на здравјето на човекот, а внесување на продукти кои изобилуваат со хранливи состојки. Поедноставено: да се внесува она што на организмот му треба, а да се избегнува она што му штети.

Но, овој концепт не завршува тука. Некои го прошируваат до ниво на поистоветување со концептот на здрав живот, здрав начин на живот. Сепак, подобро е да се каже дека здравата храна е само составен елемент на здравиот начин на живот. Овој концепт е дополнет и со други елементи како: физичка активност, доволен сон, сведување на минимум на факторот наречен стрес и сл.

• Зошто сè поинтензивно се зборува за здравата храна?

Современата медицина му овозможила многу благодети на човековиот живот: нашла лек за многу заразни болести, пронашла вакцини и сл. Но сепак, повеќе од очигледно е дека ја губи битката со т.н. болести на современото доба: рак, дијабетес и сл. Фармаколошката индустрија, водена од слепата желба за профит, пушта во производство „лекови“ за кои и самата е свесна дека не ја лечат болеста за која се наменети. Зошто ова надлежните институции не го санкционираат (на светско ниво, не само кај нас), е сосема друго прашање, кое ќе не воведе во економско-политички размисли, кои во оваа прилика нема да ги разгледуваме.

Современите неизлечиви болести ги принудуваат пациентите (оние кои директно се засегнати од нив), како и луѓето кои вистински се грижат за добробитта на индивидуите и општеството да истражуваат, да бараат нови начини на борба со болестите, да експериментираат со други алтернативи. Значи, ќе речеме, здравата храна се јави како една од современите алтернативи во неможноста на конвенционалната медицина да даде позитивен резултат за некои болести.

Сепак, размислете подобро. Дали со здравата храна, која толку ја промовираме, правиме досега невиден исчекор, дали е тоа иновативен концепт, дали измислуваме нешто револуционерно? НЕ....Само прашајте ја баба ви што јадела кога била дете и споредете ја нејзината исхрана со исхраната која денес ја нарекуваме здрава. Ќе видите дека се поклопуваат.

• Баба ми, јас и исхраната

Баба ми јадела леб од цели жита, тврд и ронлив, а не бел, мек и миризлив, каков што јадам јас сега. Едноставно, во нејзино време немало бел леб. Житото го носеле на воденица и добивале брашно од целото зрно.

Баба ми јадела зеленчук кој сама си го произведувала (со семејството) во блиската бавча до куќата. Не знаела за пестициди, хербициди и слични „заштити“ на растенијата. Ќе се јадело колку што ќе дал Бог (колку што ќе се погодела годината врнежлива, сончеви периоди и сл.). Тоа е она што денеска го нарекуваме органско производство. Ние сега јадеме моркови со тешки метали, јаболка со пестициди...

Баба ми не јадела колачи, торти, бонбони, бисквити. Едноставно, тогаш немало такви продукти. Сите тие се „придобивка“ на индустријата. Баба ми се заблажувала со свежо овошје во годишните времиња кога го имало во таква состојба, а во зима со суви сливи, јаболка, смокви, грозје и сл.

Баба ми јадела клавчиња, каша од овес, соја, кои не знам дали ние воопшто ги јадеме еднаш годишно.

Баба ми работела на нива, била физички активна цел ден, не поминувала по 5 саати пред компјутер и 3 саати пред телевизор дневно.

Баба ми имала смирен, едноличен и бавен живот. Не била во трка за пари, престиж, углед, и не живеела со темпо кое личи на  „брзина на светлината“. Значи, имала помалку стресови од нас...

И сега, како баба ми била здрава и на 80 години???..Ете како....

Кој сега ќе се осуди да рече дека здравата храна е изум на современоста???