Македонска паштета од грав

Петок, 28 Ноември 2008 05:09

Ако сте во дилема околу тоа како најдобро можете да си го обезбедите вашиот здрав „вегански“ појадок, 8-ка ќе ви помогне лесно да се справите со тоа.

Овој пат ќе ви понудиме рецепт за брза, лесна и практична „веган паштета“, која е „модерен“ начин на консумирање на традиционалната и здрава македонска храна.

Подготвувањето на оваа паштета е многу брзо и лесно, особено затоа што можете да ја подготвите оние денови кога за ручек подготвувате грав, и истиот да го искористите вечерта или наредниот ден, за подготвување на вашите „веган сендвичи“ за дома или за на работа.

Подготовка:

Доволно е 100 грама бел македонски грав, кој не мора да го варите посебно, туку едноставно извадете варени зрна грав од садот во кој го подготвувате гравот за ручек.

Во садот од кујнскиот миксер ставете ги варените зрна грав и додадете поситно исечкан праз и малку кромид, поситно исечкана пиперка (оние кои сакаат пикантен вкус, може да стават лута пиперка или пипер – „буковец“).

Ставете две до три лажици вода во која се варел гравот и измиксајте со блендерот.

Смесата ставете ја во сад и додадете една лажица сусамов таан. Зачинете со малку суво и ситно изронето нане или оригано (по желба), додадете сол по вкус.

Паштетата може да стои во фрижидер 3 – 4 дена и да се јаде како намаз со парчиња интегрален леб.

Во ваквиот „вегански сендвич“ има 0% холестерол!