„Твиги“ ќовтиња

Петок, 28 Ноември 2008 05:13

(5 гласа, просек 5.00 од 5)

Можеби ви остана од оризот подготвен за ручек или за вечера? Не сте сигурни дали ќе може да го понудите и следниот ден бидејќи вашата фамилија не би била воодушевена ако двапати и се понуди исто јадење? Што би можеле да направите, за да го искористите оризот подготвен во тавче, а сепак да имате нешто ново и вкусно, и пред сè здраво „веган“ јадење?

Ништо полесно:

Земете две свежи тиквички, излупетете ги и изрендајте ги на ренде. Истото направете го и со 5 – 6 свежи моркови.

Тиквичките оставете ги неколку минути да се исцедат од вишокот течност, или едноставно – истискајте ги на цедалка. Изрендајте една главица кромид и ситно исецкајте половина „китка“ магдонос. Исецкајте и 50 грама маринирани шампињони.

Измешајте ги сите намирници заедно (тиквичките, морковите, кромидот, шампињоните и магдоносот) и додадете го оризот кој ви останал од претходниот ден.

На целата смеса додадете и 50 грама „тофу“ сирење, кое претходно сте го измиксале со малку соино млеко. Ова има за задача покомпактно да ја сврзе смесата за ќовтиња.

Смесата зачинете ја со „гомасио“ – зачин од интегрален сусам, малку био – зачин, црн пипер и буковец, по желба. Измесете сè убаво со дрвена лажица, а потоа со рака формирајте ќовтиња. Ставете ги во тавче, на алуминиумска фолија, и печете ги во рерна на 200 степени, околу 40 минути.

Ќовтињата можете да ги сервирате со домашен сос од домати.

Не стеснувајте се да изедете онолку колку што сакате од овие брзи „твиги“ ќовтиња. За разлика од ќовтињата на кои сте навикнале и кои ги подготвувате од мелено месо и зачини, од овие ќовтиња вашата „твиги“ линија ќе остане иста, или ако сè уште не сте ја достигнале, во тоа ќе ви помогнат токму ваквите „твиги“ ќовтиња.