Топла салата со наут

Среда, 24 Декември 2008 06:28

Оваа салата ја јадев во еден од нашите ресторани, и бев пријатно изненадена од избалансираниот вкус кој го овозможува. Во домашната кујна ја подготвив малку модифицирана.

Потребни состојки за две порции:

1 главица поголем кромид;

8-10 зелени свежи пиперки;

2 моркова;

1 тиквичка;

200 гр. сварен наут;

100 гр. Сусам;

сол, црн пипер, маслиново масло и масло од семки од тиква;

по потреба, за вкус, сварена везена пиперка.

Подготовка на наутот:

Наутот треба да отстои една вечер потопен во вода и наредниот ден е потребно да се вари 1,5 до 2 часа, на почетокот, на појака температура, додека не се собере пената од варењето, и после се намалува температурата.

Подготовка на топлата салата:

Мешавината од маслата се загрева во обична или вок тава, се додава кромидот исечен на тенки полумесечинки, потоа се додаваат исечканите моркови и исечканите пиперки во вид на ленти. По кратко пропржување, се додава исечканата тиквичка и се додава малку сол, за да излезе водата од зеленчукот, во која тој кратко се динстува. При крајот се додава лутото везено пиперче и сварениот наут и смесата се остава да се хомогенизира. Во посебен сад се потпечува сусамот, се толчи и на крај се додава во топлата салата, заедно со солта и црниот пипер. Салатата може да служи како предјадење, како прилог на јадењето или како главно јадење.