ГРАДИНАРСКО ТАВЧЕ

Напишано од Кујната на 8-КА Вторник, 31 Мај 2011 19:10

Овој вкусен оброк за ручек можете да го подготвите многу брзо, дури и откога ќе пристигнете од работа, но можете да го подготвите и како вкусен неделен ручек.

Потребно е:

една чаша исчистен и измиен интегрален ориз, свежа зелка, две свежи пиперки, шампињони, млада тиквичка, главица кромид, моркови, зачини ...

Исчистениот ориз се измива најпрво со потопла вода и се остава да се покисне во вода дваесетина минути. Оризот може да стои покиснат во вода и подолго време, зависно од тоа кога можете да го отпочнете подготвувањето на ручекот.

На страна се сецка една главица кромид и се става во тавче да се динста со половина чаша вода и едно мало лажиче толчено ленено семе. Се мијат шампињоните (се одбираат помали шампињони за да можат да се подготвуваат цели), и се додаваат на кромидот. Пиперките се сецкаат на тркалца, исто така и морковите и се додаваат на кромидот кој се динста. Тиквичката се лупи и се сецка на коцки со големина од еден сантиметар, додека зелката се сече на покрупни делови. И тој зеленчук се додава на предходниот.

Динстањето не треба да трае долго за да не се распадне зеленчукот. Значи се динста пократко време за да зеленчукот остане крцкав. Пред крај се зачинува со малку морска сол, малку мелен бибер, свеж магданос или некој друг зачин по ваша желба, но не зачин кој содржи премногу сол.

Истовремено кога почнува подготовката на зеленчукот, во друго тавче се става оризот кој се меша со ситно исецкани перца од млад кромид, се зачинува со малку морска сол и мелен бибер и се залева само со вода (два хоризонтални прсти над нивото на оризот). Се става во загреана рерна. Ако имате соодветен сад за подготвување на пареа и оризот може да се подготвува одозгора, односно на ринглата од шпоретот.

Во чинијата оризот се гарнира со подготвениот зеленчук. Оние кои сакаат да јадат леб, можат да јадат интегрален леб и со ова јадење без да се плашат од здебелување.

Како додаток можете да си подготвите салата од црвени домати.